Fornybar energi er ofte meir fluktuerande enn fossile energitypar, og energilagring vil difor vere ein vital komponent i eit lågutsleppssamfunn. Gode metodar for å lagre energi gjer at overskotsenergi som blir produsert i tidspunkt med låg etterspurnad kan bli tatt vare på og brukt seinare når den trengs.

Fraunhofer IEE i Tyskland sitt «StEnSea»-energilagringsanlegg blei vellukka testa i ein innsjø på 100 meter djup i 2017. Dette er eit trykkbasert anlegg som skal bli plassert på sjøbotnen, helst djupare enn 500 meter. I lys av dette blei dette prosjektet etablert som eit forstudium av lagringsteknologi i ein fjord i Møre og Romsdal. I prosjektet skal det bli gjennomført ein studie av lagringsteknologi og av behov og potensiale for energilagring i Møre og Romsdal, og eit demonstrasjonsprosjekt av StEnSea-anlegget i skala 1:3 skal bli planlagt.

Prosjektet er finansiert av Møre og Romsdal fylkeskommune, Tussa Kraft AS og Tafjord Kraft AS.