Det europeiske vassdirektivet stiller krav til forvaltinga av vassmiljø i Norge og Europa. Desse krava seier at vatnet skal forvaltast som ein heilskap, og elvar, innsjøar, grunnvatn og kystvatn skal sjåast i samanheng. I tillegg skal og vasskjemi, økologi, og fysiske forhold i vatnet sjåast i samanheng med kvarandre. Til vassdirektivet har Direktoratgruppa (2018) laga ein rettleiar for norske farvatn, der biologiske, kjemiske og fysiske kvalitetselement blir klassifiserte til forskjellige tilstandsgrader basert på verdiane ein måler, frå «svært god» til «svært dårleg». Klassifiseringsgrensene for dette systemet varierer mellom forskjellige regionar langs kysten, og mellom vasstypar. Det er eit mål at ingen vassforekomster skal ha lågare enn "god" tilstandsgrad.

Runde Forsking er underleverandør for Akvaplan-NIVA i resipientundersøkinga for Ålesund og Sula kommunar. Her gjer vi undersøkingar av hydrografi, næringssaltkonsentrasjon og klorofyll. I tillegg assisterer vi Akvaplan-NIVA i felt med fjøresoneundersøkingar og undersøkingar av blautbotnsfauna og sedimentkjemi.